ខេត្តកែប : ឧទ្យានជាតិកែប
ឧទ្យានមានផ្ទៃដី ៩.០០០ ហិកតានេះ ជាឧទ្យានតែមួយគត់ដែលស្ថិតនៅក្នុងទីរួមខេត្ត មានទិដ្ឋភាពដ៏ស្រស់ត្រកាលនៃឆ្នេរខ្សាច់មាត់សមុទ្រនិងព្រៃកោងកាង។ ទីនេះបានដើរតួជាជម្រកធម្មជាតិដ៏សំខាន់សម្រាប់សត្វព្រៃ ដូចជាចតុប្បាទបក្សាបក្សីសម្បូរបែបប្រកបដោយជីវសាស្ត្រចម្រុះ និង សោភណភាពទេសភាពស្រស់បំព្រង ហើយត្រូវបានប្រកាសជាឧទ្យានជាតិដោយព្រះរាជក្រឹត្យ ដែលឡាយព្រះហស្ថលេខាដោយព្រះបាទសម្តេចព្រះនរោត្តម សីហនុវរ្ម័ន នាឆ្នាំ១៩៩៣។ ភ្ញៀវមិនច្រើនទេ ជាពិសេសទេសចរក្នុងស្រុកដែលបានដឹង និងបានដើរកម្សាន្ដលេងលើភ្នំនៃឧទ្យានជាតិកែប។ នៅផ្លូវជុំវិញភ្នំ យើងអាចជិះកង់ ឬជិះម៉ូតូ។ មានផ្លូវដើរ ពីកំពូលភ្នំ១ទៅកំពូលភ្នំ១លើចម្ងាយផ្លូវ៨គីឡូម៉ែត្រ លើភ្នំកម្ពស់ត្រឹម ១៤០ ម៉ែត្រ ត្រង់ចំណុចកំពូល។ នៅទីនោះទេសចរអាចគយគន់ផ្ទៃសមុទ្រជួរភ្នំបូកគោនៅភាគខាងត្បូង ក៏ដូចជាកោះត្រល់ផងដែរ។ ផែនទីនឹងបង្ហាញអំពីចំណុចសម្រាប់គយគន់ខេត្ដកំពត ទឹកធ្លាក់ស្រីតាល់ ចំណុចកំពូលភ្នំ ទេសភាពឆ្នេរអង្កោល ស្រះតូច មជ្ឈមណ្ឌលតាំងសមាធិ កន្លែងគន់ថ្ងៃលិច និងសេះថ្មជាដើម។ឧទ្យានជាតិ គឺជាកន្លែងលំហែដ៏ពេញនិយមបំផុតសម្រាប់អ្នកចូលចិត្តឡើងភ្នំ ដើរលេងដោយថ្មើរជើង និងគយគន់ថ្ងៃលិច។ មកដល់ពេលនេះ ឧទ្យានជាតិកែបបានរៀបចំផ្លូវបេតុងថ្មីមួយដែលធ្វើឲ្យមានភាពស្អាត និងងាយស្រួល ក្នុងការធ្វើដំណើរកម្សាន្ត មើលទេសភាពដ៏ស្រស់ស្អាតមានទាំង សត្វស្វា និងសត្វជាច្រើនទៀតដែលវាចុះមកស៊ីចំណី តាមដើមឈើដែលមានផ្លែតាមផ្លូវឧទ្យាន។ វាមានទីតាំងស្ថិតនៅក្នុងក្រុងកែប ងាយស្រួលសម្រាប់អ្នកទេសចរឆ្លៀតពេលចូលទៅទស្សនា។
ព្រឹត្តិការណ៍
គុនល្បុក្កតោខ្មែរ
ល្បែងទាញព្រ័ត្រកម្ពុជា
